超級荒謬劇


一個高大威猛,摵眉鷹鼻男子,一手持疑似利刀,指着一個人,上下其手,將人家身上銀包掏出,袋入自己袋中。坊眾不值其所為,合力將他逮住,交給差人。

差人一睇呢件嘢,你望我眼,我望你眼,點做?唔做又唔得,响有默契之下搵個符碌接咗手。符碌冇辦法,好嘅唔益我,要鯁呢劑嘢,慘過食屎啦,只有揜住個鼻,鯁就鯁啦。於是,符碌同疑人共處一室,照例落簿,問疑人:「人哋話你搶嘢?」疑人答:「你都戇居嘅,冇咁嘅事!」符碌隻腳軟一軟,口窒窒又問一問:「有人話,睇到你隻手揸住把利刀指住人。」疑人話:「乜嘢利刀呀?枝雪條嚟㗎咋,我好心想請佢食雪條之嘛!」符碌話:「係,係想請佢食雪條……雪……雪,雪字點寫呀?」疑人話:「雪字都唔識寫,我幫你寫嘞!紙筆攞過嚟俾我啦!」符碌就將紙筆墨遞俾疑人。疑人話:「咪住,你寫明邀請我幫你寫,簽埋字我先同你寫。」符碌當然簽埋名。疑人於是咁樣寫:响街度行緊,啱啱口乾,看到有部雪糕車响度,買咗條雪條想食嚟解渴,見到有個人斜斜傍响燈柱度,好似好辛苦,我就埋去問佢做乜嘢?使唔使幫忙?佢話自己血糖低,想暈想暈咁,我咪俾條雪條佢食囉,有啲糖落肚可以頂住先。佢一味話唔使,我救人心切,想俾佢食,佢又唔肯食,咪推推擁擁囉。唔知點解啲人話我搵刀指住佢?條雪條會反光㗎嘛,啲光閃吓閃吓,啲人咪以為我揸刀指住佢囉,佢終於都俾我塞咗條雪條入口度,個人冇事嘞。佢感激我,送咗疊錢俾我,係咁簡單之嘛。

超級荒謬劇