古國文明


我們嚮往西方文明,西方人也深入研究東方文化,一東一西都是人類,大家有好多共通點,好易溝通。比如我們走到意大利,漫步街頭欣賞每處充滿藝術結晶的建築物,樓上大嬸搬出一張地氈,來到騎樓將手一抖,「啪」然一聲,你抬頭張望食正一口一臉灰塵,豪邁之情與中國大媽不遑多讓。在威尼斯「嘆息橋」上不期然會發出一聲長嘆,怎麼這裏的味道和我生活在廣州荔枝灣那種味那麼相似,那麼相近?六十年前那份情懷從鼻孔中透入,一份穿越感剎那間呈現,噢,坑渠水的臭味!只是,意大利人比我們中國人落後,一千幾百年嘅舊物總係攬住不放,唔似我哋中國人識得與時並進。

睇睇我哋今日廣州,第十甫步行街有幾先進就可知道,以前烏燈黑火嘅上下九路,而家晚晚燈光火着如同白晝,沙面洋房間間大光燈射住,光過片場水銀燈,夜間走近,最好戴上黑眼鏡,否則對眼睛傷害程度僅次於直接觀看日蝕。從前家附近荔灣涌重新挖出,涌上白石橋一條條建起,因為有了核電,唔使憂冇電用,恍似上下九、第十甫、沙面的燈光,當然地強烈地照住白石橋。天空的黑襯托橋上的極白,將所有景物變成一片白色平面佈景板。張藝謀印象西湖的惡俗,佈滿全國各地,竟然沒有人明白一枝燭的花燈在夜間掩映才有美感,情侶食晚餐用大光燈照住,哪裏還有羅曼蒂克的氣氛?不過,有一物事盡情顯露出來了,你看,那是錢呀,錢錢錢……遍地都是錢,你哋有咩?

古國文明