臨老驚丟架


今時今日,無論在巴士裏邊,在地鐵車廂中都非常安靜。早幾年好多罔顧大眾安寧的人士肆意地大大聲講電話的聲音極少聽得見,人人都是低頭族,手指忙於點撥,沉醉於自己的世界,真有大隱隱於市之物外情懷。每個人都見聞廣博,互聯網無遠弗屆,世上一切都在指掌之中,羨煞我等電腦盲老餅。

在外國,由於互聯網購物風氣如狂風掃落葉,好多好多實體百貨公司大量倒閉,中國馬雲財產倍增就是淘寶的成功。唉,我等老餅購物要看,要摸,左揀右揀,左比右比,著上身試吓啱唔啱身的風氣日漸減少。今日撳兩撳貨物就送上門,唔鍾意又退返去。以前見啲女士,日日行百貨公司行幾個鐘頭,真係難為雙腳。咁嘅,做足晒運動身體好,唔怪得而家香港百歲老人都有幾千個,遲啲,百貨公司結晒業,呢啲老年人口過剩問題可能會圓滿解決㗎嘞。

我呢啲落後老人,唔識電腦,唔識用唉,再遲啲,冇人識同你溝通,諗落真係好危險。有人話:可以與時並進㗎嘛,唔識就學,世上只怕有心人啫。係,眼慢、手慢、腳慢,冇記性,嗰頭講完嗰頭唔記得,又要問,問一次答你,問兩次唔耐煩,問第三次,死啦,博鬧。唉,我哋呢種人係阻住個地球轉㗎,老只有認,但係總會問:老,究竟係有冇價值呢?你曾經為社會出過一點力,但係你又太長命,成為社會沉重嘅負荷,總係應該有個好好嘅方法令我哋班老藕快快樂樂咁光榮結業㗎,真係好擔心,死又怕,太長命又怕。

臨老驚丟架