【直擊婚宴】新抱仔畀奶奶二百分 家燕姐致辭好感動


whatsapp-image-2018-06-11-at-22-08-46-1

家燕姐、一對新人及親人在台上向賓客祝酒。

 

家燕姐囝囝石耀庭嘅婚宴開始了!一對新人在台上祝酒,當然唔少得多謝媽媽家燕姐同岳父岳母的養育之恩,仲講到喊,好感動,不過家燕姐上台講嘢,更加感人,講講下,家燕姐都忍唔住眼淚添!

石耀庭同老婆Zoe在賓客的歡呼同掌聲中步人會場,上台後,司儀林盛斌就叫一對新人同大家分享下感受,石耀庭雖然一早準備了貓紙,不過講到老婆的好,媽咪的養育之恩,就忍唔住爆喊,要老婆幫手抺眼淚,忍住淚的他說:「我們終於結婚了,我愛你,能夠認識你,好似搵到我人生的一塊砌圖……」又忍唔住喊,然後多謝岳父岳母養育了一個咁乖巧的女,仲當眾同岳父講,會做一個負責任的丈夫,好好照顧老婆,叫岳父放心。而Zoe就話老公求婚之後,從來未見過佢咁努力,去籌備婚禮,「我有時發脾氣,佢包容,忍得好多,好難得搵一個咁張就我脾氣嘅人,佢同我成日講一句,你㨂啦㨂啦,你想嘅我一定幫你實現!」

 

whatsapp-image-2018-06-11-at-18-26-49-1

回想起廿多年前的不平坦日子,家燕姐說當時仔女只得幾歲,自己不知道怎樣能養育她們,幸好影視圈有許多人給她機會,通統是她的恩人。

講到奶奶家燕姐,「難得識到一個有傾有講,一齊相處嘅奶奶,她真的好疼我,佢成日同人講,畀我一百分,今晚我想要畀返佢二百分!」二人下台送花畀家燕姐,三個人攬埋一堆,好溫馨,當然仲有送花畀岳父母啦!
輪到家燕姐上台,佢蓮子蓉咁嘅面,開心地說:「今天我係好開心,七點就起身,今日係我期待嘅一天,大家都係大忙人,好多謝大家出席我今日……哈哈,我個仔嘅婚禮,最近我成日講錯,哈哈……今日在座好多朋友都睇住我嘅仔女長大,大家都知廿幾年前,我啲仔女好細嘅時候,那段日子,我比較唔係咁平坦,擔心點樣養大佢哋呢?得嗰幾歲,又擔心,自己紅得幾耐呢?可能紅得兩年就冇嘢做喎,一路好有壓力,好彩呢,我有份衝勁,肯去做,仲有我三個仔女好聽話,好難得,我好感恩,在座好多影視界朋友都是我恩人,冇你哋愛戴,我三個仔女冇咁順風順水去行,我那時諗,我點送到佢地去讀大學呢?真係好好彩,大家嘅支持,無綫呀,新城呀,威馬電器,個個都超過廿年嘅,我仔女啲學費全部都係佢地交,仲有多謝大家,我趕幾組又遲到,大家都好包涵,去寬容接納我,啟發我領導我,可以讓Jackson留學,學成歸來,事業有成,仲可以成家立室,(哭)我真係好開心,因為我期待呢個日子好耐,唔好意思,剛才在下面仲諗住自己唔會咁(哭),所以今天當我仔同新抱向我敬茶,我就好想喊,新抱同我敬茶,係我期待一天,我真的好開心,再次多謝大家,所以Jackson你今天成為一家之主,人地丈夫,要呵護你嘅太太,愛護你嘅家人,Jackson聽到?仲有多謝襯家,公公婆婆,把Zoe教育得好好,知書識禮,好有愛心,大家好有緣,一見如故,又愛鍚Jackson,好感激你地,我地一定好好對Zoe嘅,多謝你地嘅信任,多謝!仲有,我派晒帖請賓客那時,我個仔同我講,媽咪,點解我得一圍,所以今晚佢同人講,我係Jackson,怕大家唔知佢係邊個?哈哈……」
然後,又到睇住Jackson大嘅七公主之四位公主上台,馮素波、沈芝華、陳寶珠同王愛明就輪流恭賀家燕姐,沈芝華話:「百年好合,出年生……(生B)」寶珠姐就說:「睇到家燕嘅仔成家立室,雖然辛苦啲,值得恭賀,祝福一對新人永結同心,孝順父母,快些生B畀家燕,佢好恨。」馮素波同王愛明亦送上祝福,而蕭芳芳就因為太累,先行回家休息。

img_9221

兒子成家立室,家燕姐話等這一天等了好耐了。

薛家燕娶新抱Jackson七公主石耀庭結婚陳寶珠