【澳門騷加料】 思捷 祖藍 祥仔 邊個先係扮嘢王?


 

aaa-1

王祖藍、阮兆祥、李思捷昨晚(7號)於澳門舉行《福祿壽十周年澳門站演唱會》,估唔到佢三個誠意十足,加料炮製新環節再挑戰扮嘢神技,究竟邊個先係真正扮嘢王呢?

思捷今次神技再升級,同扮肥姐造型登場幾可以假亂真的細細粒合唱《愛在心內暖》,聲音勁似秋官鄭少秋,仲加插咗談情說愛的對白,最後更愈哄愈埋兼借位「狂嘴」,真係欣宜睇到都會俾like!

祖藍獻唱《祝福你》時,瘋狂模仿譚校長的抖腳姿勢,雖然係誇張咗啲,事後亦遭思捷寸爆:「喂!祖藍!你滴咗兩滴尿出嚟呀!」,但唱腔蠻神似。而祥仔用學友腔獻唱《LONDON BRIDGE》鼻音十足,由於太過肉緊唱起歌詞:「能登必處科擰單!」思捷都忍唔住話佢講粗口,祥仔反擊:「咩呀!我呢個係牛津發音。」

三個扮嘢王你又最喜歡邊個呢?

王祖藍阮兆祥李思捷澳門福祿壽