【全球期待】《復仇者》監製率先爆《無限之戰》劇情感人


3352819-avengers-3-infinity-war-21-wallpaper

《無限之戰》監製Kevin Feige剛剛話套片仲未畀其他人睇之前,佢當然一早睇咗剪好嘅版本。

 

經過10年鋪排的《復仇者聯盟:無限之戰》後日本周三港美同步上映,大家都好想知道今集故事班Marvel超級英雄有冇驚人發展,邊位會喺呢場大戰壯烈犧牲。Marvel Studio主席兼《無限之戰》監製Kevin Feige剛剛接受咗美國娛樂網站專訪,佢話套片仲未畀其他人睇之前,佢當然一早睇咗剪好嘅版本,話咗劇情要保密,又睇下佢有乜嘢爆。

美國娛樂網站Comingsoon.net,剛剛同Kevin做咗個專訪,當佢被問到睇完拍好咗嘅《無限之戰》之後有冇乜嘢驚喜時,Kevin話:「呢條係好好嘅問題。其他人仲未睇套片,我仍然好期待全世界觀眾睇完之後嘅反應。我已經率先睇咗,絕對覺得劇情非常非常感人,雖然我已經歷過拍攝咁多部Marvel超級英雄電影,但仍然覺得今次係意料之外咁感人。」

Kevin仲話:「今次套片係從未見過咁多超越英雄面對戰鬥力超班嘅魁隆(Thanos),令我覺得有份令我意想不到嘅感人力量,我覺得要歸功於編劇Chris Markus同Stephen McFeely,導演安東尼羅素(Anthony Russo) 同祖羅素(Joe Russo)兩兄弟,仲有佐斯布連( Josh Brolin)演繹魁隆呢個角色,都比我們預期精彩。」

聽Kevin咁賣花讚花香,佢都係冇劇透,而一眾扮演《復仇者》超級英雄的影星,今日亦剛剛喺洛杉磯出席記者會,當然又會畀在場記者追問故事發展,《銀河守護隊》飾演星爵(Starlord)的基斯派特(Chris Pratt)被問到佢個角色在片中相隔30年回到地球有乜感覺時,佢大談釣魚來做擋箭牌防止劇透。連導演安東尼羅素(Anthony Russo)被問到今集會否出現劇集《神盾局特工》的角色時,佢都學似基斯大講釣魚。

至於有傳扮演奇異博士嘅班尼狄甘柏貝治拍攝時收到完整劇本,佢今日就話:「我收嗰個劇本係咪真係套片個劇本,要聽晚睇完首映至知,有可能我睇嗰個都未必係大家喺戲院睇到嗰個故事嘅劇本。」

一眾扮演《復仇者》超級英雄的影星,今日亦剛剛喺洛杉磯出席記者會,氣氛熱鬧。

講咗咁多,佢哋都係唔想劇透,等大家去戲院睇有驚喜。

撰文:安東尼奧

 

 

復仇者聯盟Marvel奇異博士安東尼羅素Anthony Russo超級英雄無限之戰Kevin Feige