【等咗十年】楊丞琳 陳柏宇首次現場合唱〈理智與感情〉


台灣女歌手楊丞琳(Rainie)一連兩場的《青春住了誰 Youth Lies Within》演唱會今晚喺紅館展開,Rainie事隔6年再次來港開演唱會,唔少粉絲大呻等到就快變長頸鹿。不過今晚完Show之後唔少香港粉絲都表示非常滿足,事關Rainie今晚講咗好多地道廣東話,仲幾乎唱晒所有青春偶像劇主題曲,而且仲邀請到陳柏宇(Jason)做嘉賓同台合唱〈理智與感情〉!

001

心水清嘅粉絲都知道合唱歌〈理智與感情〉係成10年前嘅作品,但係咁多年嚟佢哋兩位從未試過現場合唱呢首歌。所以在場觀眾今晚見到Jason出場,掌聲同尖叫聲都冇停過。而Jason係騷後都上傳咗二人合照去社交網,仲留言話:「等咗十年,終於有機會同楊丞琳合唱〈理智與感情〉喇!」睇嚟陳柏宇對於呢個十年相約都同各位一樣非常興奮呢!

延伸閱讀:原來楊丞琳已經入行17年了…….

 

Rainie今晚亦唱咗唔少廣東歌,當中包括〈矛盾一生〉、〈高山低谷〉等,至於代表作〈年輪說〉、〈曖昧〉、〈想幸福的人〉就當然唔少得啦。另外,Rainie喺開場仲好調皮同大家攪氣氛,問現場觀眾覺唔覺得佢皮膚好好,跟手話見到個皮膚靚過佢嘅阿嬌(鍾欣潼),仲行埋去錫佢一啖添。

延伸閱讀:【一日一經典】可愛教主楊丞琳   偶像劇歌曲逐隻數

圖片來源:陳柏宇@Instagram
影片來源:Ethan Wong@YouTube、alstonn、thomaswong1023

楊丞琳陳柏宇理智與感情JASON