【李佳芯扮鬼?】《波士早晨》向星爺致敬 捉鬼要用保鮮紙


2018-03-01_132357

喺《波士早晨》飾演Roxie嘅李佳芯自從同洪永城攤牌後就無家可歸,馬玳落地行唯有靜靜雞係公司過夜。點知咁啱就畀一對偷食情侶撞破,以為公司有白衣鬼,仲揚言話要用保鮮紙同吸塵機嚟捉鬼添。唔少星爺粉絲睇到呢幕都會覺得似曾相識,事關星爺Cult片經典《回魂夜》有一幕提到:「捉鬼要用保鮮紙,打鬼要用朱古力。」然後仲將成件事講到好合理又爆笑添。

《波士早晨》會出現呢幕,唔多唔少都話咗畀大家知道編劇都係一個星爺粉,所以忍唔住要向星爺致敬。另一方面,李佳芯係呢一場戲表現不俗,唔單只做到調皮又驚青嘅效果,當佢見到黃智賢係微波爐拎佢條「叮」乾咗紅色內褲出嚟,仲有種被陌生人見到自己內衣褲着咩尺寸嘅感覺添。老實講,雖然呢條橋唔係第一次見,但仍然做到唔錯嘅喜劇效果,再次證明橋唔怕舊,最緊要受。最後,筆者當然唔會叫各位讀者試下「叮」內衣褲,因為咁貼身嘅衣物叮完都唔敢着,簡直損人不利己。

2018-03-01_132500

圖片來源:互聯網

影片來源:my TV SUPER,大都會電影

波士早晨星爺李佳芯回魂夜捉鬼保鮮紙